ብፁዕ አቡነ ዕንባቆም የኢየሩሳሌም ሊቀ ጳጳስ ኾነው ተመደቡ

  • በጎጥና በኑፋቄ ቡድኖች የሚታመሰው የድሬዳዋ ሀ/ስብከት አፋጣኝ መፍትሔ ይሻል

ብፁዕ አቡነ ዕንባቆም

ብፁዕ አቡነ ዕንባቆም
ብፁዕ አቡነ ዕንባቆም

ቅዱስ ሲኖዶስ በዛሬ፣ ጥቅምት ፲፭ ቀን ፳፻፯ ዓ.ም. አራተኛ ቀን ውሎው የድሬዳዋና ምዕራብ ሐረርጌ ሊቀ ጳጳስ የኾኑት ብፁዕ አቡነ ዕንባቆም፣ በኢየሩሳሌም የኢትዮጵያ ገዳማት ሊቀ ጳጳስ ኾነው እንዲሠሩ የምደባ ውሳኔ አሳልፏል፡፡

ምልአተ ጉባኤው ውሳኔውን ያሳለፈው፣ ከግንቦት ፳፻፭ ዓ.ም. ጀምሮ የኢየሩሳሌም ሊቀ ጳጳስ ኾነው በነበሩት ብፁዕ አቡነ ዳንኤልና በማኅበሩ መካከል በተፈጠረው አለመግባባት ዙሪያ ከመከረ በኋላ ነው፡፡

አለመግባባቱን ለመፍታት ፈቃደኛነታቸው ተረጋግጦ በተነሡት ብፁዕ አቡነ ዳንኤል ቦታ ለመመደብ ያመለከቱ ብፁዓን ሊቃነ ጳጳሳትን ጥያቄ መርምሮ ለውሳኔ የሚያቀርብ አምስት ብፁዓን ሊቃ ጳጳሳት የሚገኙበት ኮሚቴ በትላንትናው ውሎው ሠይሞ ነበር፡፡

የኮሚቴው አባላት ብፁዓን ሊቃነ ጳጳሳት አቡነ ገሪማ፣ አቡነ ቀውስጦስ፣ አቡነ እስጢፋኖስ፣ አቡነ ጎርጎርዮስ እና አቡነ ዲዮስቆሮስ÷ ለምልአተ ጉባኤው ምክረ ሐሳባቸውን ካቀረቡ በኋላ ከፍተኛውን ድምፅ ያገኙት ብፁዕ አቡነ ዕንባቆም እንዲመደቡ መወሰኑ ታውቋል፡፡

ብፁዕ አቡነ ዕንባቆም ከጥቅምት ፳፻፭ ዓ.ም. ጀምሮ የድሬዳዋና ምዕራብ ሐረርጌ አህጉረ ስብከትን ሲመሩ ቆይተዋል፡፡

በተለይም ሥራው ለስድስት ዓመታት የተጓተተው የሳባ ደብረ ኃይል ቅዱስ ገብርኤል ቤተ ክርስቲያን ሕንፃ ግንባታ ጥራትና ሒሳብ በውጭ ኦዲተር እንዲመረመር ቋሚ ሲኖዶስ ያሳለፈውን ውሳኔ ከደብሩ አስተዳደር ጋራ ኾነው በማስፈጸማቸው ከፓትርያርኩ ጋራ ቅራኔ ውስጥ ገብተው ቆይተዋል፡፡

እስከ ልዩ ጽ/ቤት በተዘረጋ የሙስና ሰንሰለት ከስምንት ሚልዮን ብር በላይ የምእመናን ገንዘብ መመዝበሩ የተረጋገጠበት የኦዲት ሪፖርት፣ በደብሩ ጽ/ቤት ለምእመኑ ይፋ መኾኑን ተከትሎ የደብሩ አለቃ በጸጥታ ሰበብ ያለብፁዕነታቸው ዕውቅና በፓትርያርኩ ቀጥተኛ ትእዛዝ ተነሥተው ያለሥራ እየተንገላቱ ይገኛሉ፡፡

ፓትርያርኩ ለአማሳኞች የምዝበራ ሰንሰለት ሽፋን የሚሰጠው የጣልቃ ገብነት ርምጃቸው ስሕተት መኾኑን አምነው ብፁዕ ሊቀ ጳጳሱን ይቅርታ ቢጠይቁም በኦዲት ሪፖርቱ ግኝቶች ዙሪያ ፀረ – አማሳኝ እንቅስቃሴውን ያጠናከረው የከተማው አጥቢያ አብያተ ክርስቲያን አገልጋይና ምእመን ምዝበራን ያጋለጡት አለቃ ወደ ቦታቸው እንዲመለሱና ከዚኽ ውጭ የሚደረግ ምደባን ላለመቀበል በመወሰኑ ደብሩ ያለአስተዳዳሪ እንደሚገኝ መዘገቡ ይታወሳል፡፡

Source:: haratewahido

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.